Қазақстан парламентінің төменгі палатасында пленарлық отырыс өтті, онда депутаттар «Қазақстан Республикасы мен Монғолия арасындағы сотталған адамдарды беру туралы шартты ратификациялау туралы» заң жобасын мақұлдады, деп хабарлайды Мәжілістің баспасөз қызметі.
Пленарлық отырыста қатысушылар алдында сөз сөйлеген Қазақстанның бас прокуроры Марат Ахметжанов, аталған заң жобасы сотталғандардың жазасын әрі қарай өтеу үшін, өз еліне қайтару мәселелерін реттеуге байланысты екенін айтты.
«Шартта адамды беруді жүзеге асыруға мүмкіндік беретін нақты мән-жайлар және осындай мүмкіндікті болдырмайтын мән-жайлар көзделген. Адамды қайтару үшін бас бостандығынан айырудың өтелмеген мерзімі бір жылдан кем болмауы тиіс, сондай-ақ қайтару кезінде сот шешімі заңды күшіне енуі тиіс», — деп нақтылады Бас прокурор.
Келісім туралы айта келе, Марат Ахметжанов оның стандартты құжат екенін атап өтті. Ол бұған дейін біздің республика Өзбекстан, Вьетнам, Кипр, Аргентина, Доминикан Республикасымен және басқа да бірқатар мемлекеттермен ұқсас шарттар жасасқанын атап өтті.
Сонымен қатар, бас прокурордың айтуынша, бүгінгі таңда біздің республикамызда Монғолияның бес азаматы бас бостандығынан айыру жазасын өтеп жатыр, ал ол елде мерзімін өтеп жатқан қазақстандықтар жоқ.
