Палата Спикері Нұрлан Нығматулиннің төрағалығымен Мәжіліс Бюросының отырысы өтіп, онда депутаттардың алдағы жалпы отырысының күн тәртібінің жобасы әзірленді, деп zakon.kz хабарлады.
Палатаға әлеуметтік кәсіпкерлікті дамыту мәселелері бойынша депутаттар әзірлеген заңнамалық түзетулерді бірінші оқылымда қарау ұсынылады.
Заң жобасын қабылдау әлеуметтік кәсіпкерлік ұғымы мен негізгі міндеттерін заңнамалық деңгейде бекітуге, қандай да бір ұйымды әлеуметтік кәсіпкерлік субъектілеріне жатқызу критерийлерін қалыптастыруға және әлеуметтік кәсіпкерлік субъектілерінің қызметі бағытталған халықтың әлеуметтік осал санаттарын айқындауға мүмкіндік береді.
Бұдан басқа, заң жобасында мемлекеттік қолдау шаралары айқындалады, ал әлеуметтік кәсіпкерлік субъектілерінің мәртебесін тану, есепке алу және мониторингілеу үшін тиісті тізілім құру көзделеді.
Әлеуметтік кәсіпкерлікті қолдаудың мемлекеттік шараларын заңнамалық бекіту мақсатында парламентшілер Салық кодексіне түзетулер әзірледі. «Салық және бюджетке төленетін басқа да міндетті төлемдер туралы «Қазақстан Республикасының кодексіне (Салық кодексі) толықтырулар енгізу туралы» заң жобасын бірінші оқылымда талқылау да Мәжілістің алдағы жалпы отырысының күн тәртібіне енгізілді.
Сонымен қатар, Мәжіліс ратификациялық заң жобаларының пакетін қарайды. Бұл Қазақстан мен Әзірбайжан арасындағы көші-қон саласындағы ынтымақтастық туралы Келісім, сондай-ақ ЕАЭО туралы шартқа өзгерістер енгізу.
Аванстық төлемдерді әкелу, кедендік, арнайы, демпингке қарсы, өтемақы баждарын төлеу есебіне есепке алу мүмкіндігі бөлігінде Еуразиялық экономикалық одақтың Кеден кодексінің ережелерін іске асыру мақсатында ЕАЭО туралы шартқа өзгерістер енгізу туралы хаттамаға қол қойылды.
