Қазақстан парламенті төменгі палатасының басшысы Нұрлан Нығматулин “Президенттік институт: қазақстандық үлгі” атты халықаралық парламенттік конференция аясында Түркия, Қырғызстан, Болгария және Сербия парламенттері өкілдерімен бірқатар кездесулер өткізді. Бұл туралы ҚР Парламенті Мәжілісінің баспасөз қызметі хабарлады.
Қырғызстан Жогорку Кенеш спикерінің орынбасары Аида Қасымәлиевамен болған кездесу барысында екі бауырлас мемлекеттер арасындағы ынтымақтастықты дамытуға, соның ішінде парламентаралық өзара қатынасты нығайтуға байланысты мәселелер қозғалды.
Түркия Ұлы Ұлттық Жиналысы Төрағасының орынбасары Левент Гекпен әңгімелесу барысында екі ел арасындағы парламентаралық ынтымақтастыққа қатысты мәселелер талқыланды. Сонымен қатар, тараптар Қазақстан-Түрік қарым-қатынастарына қатысты мәселелерге назар аударды.
Болгария Халық Жиналысының вице-спикері Веселин Марешкимен және “Қазақстан-Сербия” ынтымақтастық жөніндегі парламенттік топтың жетекшісі Драгомир Каричпен кездесу барысында Мәжіліс төрағасы парламенттік кездесулер Қазақстан мен Балқан өңірі халықтарының қызығушылық танытатын мәселелерді шешуде маңызды рөл атқаратынына назар аударды.
Сурет: 24.kz
