Қазақстан парламенті төменгі палатасының спикері Нұрлан Нығматулин Солтүстік Македония ассамблеясының төрағасы Талат Джаферимен кездесті. Бұл туралы Мәжілістің баспасөз қызметі хабарлады.
Кездесу барысында Нұрлан Нығматулин Солтүстік Македония парламенті спикерінің ресми сапары парламентаралық байланыстарды дамытуға жаңа серпін беретінін атап өтті.
Қатысушылар Еуразия елдері Парламенттері спикерлерінің төртінші кеңесінің қорытындысын талқылады. Солтүстік Македония ассамблеясының төрағасы осындай ауқымды іс-шараның ұйымдастырылуын және өткізілуін жоғары бағалады.
Кездесуде сұхбаттастар бейінді комитеттерге, ынтымақтастық жөніндегі топтарға өзара жүйелі іс-қимыл жасау қажеттігін атап өтті. Сонымен қатар, тараптар екі ел арасындағы екіжақты ынтымақтастықты кеңейтуге қатысты мәселелерді қарастырды.
Кездесу соңында Талат Джафери оның елі Қазақстан Республикасының барлық бастамаларын,әсіресе БҰҰ мен ЕҚЫҰ аясындағы бастамаларын,қолдайтынын мәлімдеді.
Сурет: Inform.kz
