Мәжіліс Спикері Нұрлан Нығматулин Вьетнамға жасаған ресми сапары барысында Ұлттық жиналыс төрағасы Нгуен Тхи Ким Нганмен келіссөздер жүргізді,деп “ҚазАқпарат” ХАА Мәжілістің баспасөз қызметіне сілтеме жасап хабарлайды.
Тараптар парламентаралық ынтымақтастықтың перспективалық бағыттарын талқылап, оның белсенділігін арттыру ниетін растады. Бейінді комитеттер, ынтымақтастық жөніндегі топтар және парламенттік фракциялар деңгейіндегі тұрақты кездесулер тәжірибесі заң шығару қызметінің тәжірибесімен алмасуға ықпал етеді.
Вьетнам – еліміздің оңтүстік-шығыс Азиядағы маңызды әріптесі екенін айта келе, Нұрлан Нығматулин Қазақстан басшылығы Вьетнаммен жан-жақты өзара іс-қимылға ерекше көңіл бөліп, назар аударып келе жатқанын атап өтті.
Өз кезегінде Ұлттық жиналыс төрағасы Қазақстан Республикасының Тұңғыш Президенті Нұрсұлтан Назарбаевтың Қазақстан-Вьетнам қатынастарын орнату мен дамытудағы айрықша рөлін атап өтті.
Мәжіліс спикерінің айтуынша, ЕАЭО мен Вьетнам арасындағы еркін сауда аймағы туралы келісімге қол қою да әріптестікті нығайтуға айтарлықтай серпін берді. Вьетнам-бұл осындай келісімге қол қойылған алғашқы мемлекет. Ынтымақтастықтың перспективалық бағыттарының ішінде-ауыл шаруашылығы, жеңіл өнеркәсіп, көлік, логистика, туризм.
Нұрлан Нығматулин Мәжілістегі “Nur Otan” парламенттік фракциясының жетекшісі ретінде партияаралық диалогты жандандыруды да атап өтті.
Парламентаралық қатынастар туралы айта келе, Ұлттық жиналыс төрағасы қазақстандық парламентшілердің сапары екі елдің ынтымақтастық тарихындағы маңызды кезең деп атады.
“Менің Қазақстанға 2017 жылғы сапарымнан, сіздің еліңіздің даму деңгейінен, Қазақстан астанасының ұмытылмас архитектурасынан жарқын әсерім қалды”, – деп қосты Нгуен Тхи Ким Нган.
Вьетнам Парламентінің Төрағасы сондай-ақ, Нұр-Сұлтанда өткен Еуразия елдері Парламенттері спикерлерінің 4-ші кеңесін табысты өткізуді де атап өтті, бұл ретте қатысушы елдердің ынтымақтастықты дамытуға мүдделілігін, сондай-ақ Қазақстанның әлемдегі беделін атап өтті.
Тараптар сондай-ақ БҰҰ, АӨСШК, Оңтүстік-Шығыс Азия мемлекеттерінің қауымдастығы (АСЕАН) шеңберіндегі елдердің өзара іс-қимыл мәселелерін талқылады.
Кездесуде екі елдің азаматтары үшін визасыз режим, Қазақстан мен Вьетнам арасындағы тікелей әуе қатынасын қалпына келтіру мәселелеріне ерекше назар аударылды.
Кездесу соңында Нұрлан Нығматулин Вьетнам халқына алдағы келесі жылы Коммунистік партияның құрылғанына 90 жыл толуына орай құттықтауын жеткізді.
