Мәжіліс депутаттары өзінің пленарлық отырысында ” Ұжымдық қауіпсіздік туралы шарт ұйымына мүше мемлекеттердің ақпараттық қауіпсіздігін қамтамасыз ету саласындағы ынтымақтастығы туралы келісімді ратификациялау туралы” заңның қабылдануына дауыс берді, деп хабарлайды” ҚазАқпарат” агенттігінің тілшісі.
Келісім ҰҚШҰ-ға қатысушы елдердің кибер қауіп-қатерлерге қарсы іс-қимыл және ақпараттық қауіпсіздік жүйесін қамтамасыз ету ісінде өзара іс-қимылын реттейді. Құжат ҰҚШҰ-ның барлық қатысушылары бір-біріне көмек көрсетуді, осы салада екі жақты шарттар мен қосымша келісімдер жасасу рәсімдерін көздейді.
ҚР Қорғаныс және аэроғарыш өнеркәсібі вице-министрі Аманияз Ержановтың айтуынша, бұл келісім техникалық алмасуды, сондай-ақ ақпараттық қауіпсіздік жүйесін нығайту үшін бір-біріне жаңа технологиялар және бағдарламамен қамтамасыз етуді ұсынуды көздейді. Қылмыс, бұзу және кибер шабуылдардың жолын кесу бойынша бірлескен іс-қимыл ісінде құқықтық салада да көмек көрсету көзделіп отыр.
Бұған дейін Қазақстан ШЫҰ мен ТМД шеңберінде осыған ұқсас келісімдер жасады, бірақ жаңа құжат бұрынғы уағдаластықтарға қайшы келмейді, оларды дамытады, деп есептейді вице-премьер.
Бұдан басқа, оның айтуынша, қорғаныс және аэроғарыш өнеркәсібі министрлігінің қызметкерлері ақпараттық қауіпсіздік саласындағы 13 жобаны дайындап, Ғылыми-техникалық кеңеске талқылауға тапсырды. Егер олар қабылданса, онда мемлекет бюджетінен оларды іске асыру үшін 2 миллиард теңге бөлінетін болады.
Сулет: politring.com
