Мәжіліс Қазақстан Республикасының Тұңғыш Президенті Нұрсұлтан Назарбаевтың Еуразиялық жоспарын 25 жылдығына арналған Еуропа мен Азия елдерінің парламенттері спикерлерінің төртінші кеңесіне дайындық жүргізуде. Бұл туралы Мәжілістің баспасөз қызметі хабарлайды.
«Мәжіліс Назарбаевтың Еуразиялық жоспарын 25 жылдығына арналған Еуропа мен Азия елдері Парламенттері спикерлерінің IV кеңесіне дайындалуда. Бүгіннің өзінде 60 — тан астам ел мен 16 халықаралық Ұйымның парламенттік делегациясы осы ауқымды халықаралық форумға қатысатынын растады», — деп жазды Мәжіліс Төрағасы Нұрлан Нығматулин Twitter әлеуметтік желісіндегі өзінің ресми бетінде.
Форум 23-24 қыркүйек аралығында өтеді. Биылғы жылы оның тақырыбы: «Үлкен Еуразия: Диалог. Сенім. Серіктестік».
Австрия, Болгария, Венгрия, Германия, Италия, Словакия, Словения, Польша, Франция, Хорватия, Черногория, Ауғанстан, Вьетнам, Үндістан, Иордания, Иран, Катар, Қытай, Кувейт, Малайзия, БАӘ, Сауд Арабиясы, Түркия, Оңтүстік Корея, Жапония, Әзірбайжан, Армения, Беларусь, Қырғызстан, Молдова, Ресей, Тәжікстан және Өзбекстан форумға қатысатынын растады.
Сондай-ақ, іс-шараға ЕҚЫҰ, ҰҚШҰ, Парламентаралық Одақ, Азиялық Парламенттік ассамблея, АӨСШК және ИЫҰ Парламенттік Одағы сияқты халықаралық ұйымдар қатысады.
Форумның басты мақсаты сенім мен достық қарым-қатынасты нығайту үшін парламентаралық диалог орнату болып табылады. Еуропа мен Азияның одан әрі дамуы талқыланатын болады.
