Ресей астанасында Тәуелсіз Мемлекеттер Достастығына қатысушы елдердің, соның ішінде Қазақстан Республикасының, шекара қызметі өкілдерінің кездесуі өтті. Бұл туралы ТМД Атқарушы комитеті хабарлады.
Кездесу барысында қатысушылар өткен жылы Достастыққа мүше мемлекеттер жүзеге асырған бірлескен арнайы шекара операцияларының қорытындысына назарын аударды.
Осы операциялардың арқасында 2019 жылы ТМД елдерінің шекарашылары 3 мыңнан астам адам мемлекеттік шекара заңнамасын бұзушылықты анықтап, 3 мыңға жуық заңсыз өткен азаматтарды ұстады. Сонымен қатар, халықаралық іздеуде жүрген 180 адам ұсталды.
Осындай операциялар аясында 43 килограммнан астам есірткі заттары, 26 атыс қаруы мен 2 мыңға жуық оқ-дәрі тәркіленді.
Кездесу барысында шекара ведомстволарының өкілдері биылғы жылы бірлескен арнайы шекаралық операцияларды дайындау мен өткізуді егжей-тегжейлі қарастырып, кейін осындай іс-шараларды ұйымдастыруда тәжірибе алмасты.
Достастықтың Атқару комитеті жұмыс кездесуі бірлескен арнайы шекара операцияларын ұйымдастыруда ТМД елдерінің шекара ведомстволарының күшін реттеу үшін өткізілгендігін хабарлады.
