Қостанай облысына мәскеулік 15 дәрігер келіп, эпидемияға қарсы күресте әріптестеріне көмек көрсетеді және COVID-19 жұқтырған пациенттерді емдеу тәжірибесімен бөліседі, деп хабарлайды облыс әкімінің баспасөз қызметі.
Ресейлік мамандар тобын Склифосовский атындағы ғылыми-зерттеу институтының төтенше жағдайларда жұмыс істеуге мамандандырылған медициналық көмек бригадасының меңгерушісі Олег Черныш басқарады.
Қостанай облысына келген соң Мәскеу дәрігерлері аймақ басшысы Архимед Мұхамбетовпен кездесті. Кездесу барысында ол дәрігерлерге, соңғы мәліметтерге сәйкес 2017 COVID-19 жұқтыру жағдайы тіркелген облыстың эпидемиологиялық жағдайын түсіндірді.
Сондай-ақ, ресейлік мамандармен әңгімелесе отырып, облыс әкімі оларды індеттің таралуына қарсы аймақта қабылданып жатқан шаралар туралы хабардар етті, содан кейін Мәскеуден келген дәрігерлердің келуі облыстағы эпидемиологиялық жағдайға оң әсер ететініне сенім білдірді.
Олег Черныш өз кезегінде әкімді жұмыс жоспарымен таныстырды. Ол Қостанай облысына сапары аясында мәскеулік дәрігерлер тобы қазақстандық әріптестеріне кеңестер мен дәрістер өткізетінін, сондай-ақ пациенттерді емдеуге қатысатынын айтты.
Бүгін ресейлік мамандар Қостанай және Рудный медициналық мекемелеріне бөлінеді, ал ертең олар сол мекемелерде жұмысқа кіріседі.
Сурет: sputniknews.kz
