Қазақстан Республикасы Ұлттық ұланының Бас қолбасшысы Руслан Жақсылықов дүйсенбі күні өткен Мәжіліс депутаттарының көшпелі отырысы барысында елорда маңындағы авиабазаның құрылысын қаржыландырудың жеткіліксіздігі туралы мәлімдеді. Ол мәжілісмендерден көмек сұрады.
Жақсылықовтың айтуынша, авиабазаның құрылысы жалғасуда, бірақ қаржыландырудың жеткіліксіздігінен ол ұзаққа созылды. Авиациялық база 2018 жылы салынуы тиіс еді,бірақ мұндай қарқынмен құрылыс келесі жылдың соңына қарай аяқталады. Өткен жылы осы мақсатқа 2 миллиард 700 миллион теңге бөлу жоспарланған болатын, бірақ тек 700 миллион теңге бөлінді. Келесі жылы жобаның құны артады.
Бұған дейін хабарланғандай, Астана 5573 әскери бөлімінің базасында Қазақстан Республикасы Ұлттық ұланының 3656 әскери бөлімінің авиациялық эскадрилья жеке құрамының Алматыдан Астанаға көшуіне байланысты салтанатты кездесуі өтті.
Ұлттық ұланның авиациясы – бұл жеке құрам, жауынгерлік және арнайы техника, қару-жарақ және басқа да материалдық құралдарды тасымалдайтын, әуе іздеуін ұйымдастыратын, төтенше жағдай режимін, ТЖ мен өзге де міндеттерді орындау кезінде әскерлер мен ішкі істер органдарының іс-қимылын қамтамасыз ететін жеке авиациялық эскадрилья.
2015 жылы Астана әуежайының маңында Қазақстан Республикасының Ұлттық ұланы үшін авиабазаның құрылысы басталды. База әскерлердің ұтқыр тиімділігін арттырады және бөлімшелер мен техниканы Қазақстанның кез келген жеріне ауыстыруға мүмкіндік береді.
Сурет:баспасөз қызметі
