«Самұрық-Қазына» Ұлттық әл-ауқат қорын басқару кеңесінің мүшелері қорды инвестициялық холдингке айналдыру тұжырымдамасын мақұлдады, деп хабарлайды tengrinews.kz ақпарат ресурсы.
Инвестхолдинг болып қайта құрудың арқасында Қордың өзінің кірістері, сондай-ақ дивидендтер алу есебінен республикалық бюджетке түсетін түсімдер ұлғайтылатын болады.
Тиісті тұжырымдаманы талқылау барысында Тұңғыш Президент Нұрсұлтан Назарбаев «Самұрық-Қазына» мамандары тиімсіз инвестициялардан арылып, оларды табысты инвестицияларға ауыстыру керектігін атап өтті. Елбасының пікірінше, тек осы жағдайда ғана, дивидендтердің өсуі есебінен қазына түсімдері ұлғайтылады.
Сонымен қатар, ол «Самұрық-Қазына» ұсынған өзгерістер тәуелсіз қорларды дамытудың әлемдік тәжірибесіне сәйкес келетінін мәлімдеді.
Кеңес мүшелері тұжырымдаманы мақұлдаумен қатар, қор басқармасына індет кезінде қазақстандық тауар өндірушілерге қолдау көрсетуге бағытталған шараларды іске асыруды жалғастыруды тапсырды.
«Самұрық-Қазына» Қазақстанның ұлттық әл-ауқатын арттыру жөніндегі міндеттерді орындау және оның экономикасын жаңғырту жөніндегі жұмыстарды жүргізу үшін құрылды. Қордың жалғыз акционері — еліміздің Үкіметі.
Сурет: informburo.kz
