ҚР Ұлттық экономика министрлігі өңірлерді талдау және жергілікті өзін-өзі басқаруды дамыту департаментінің директоры Анар Байтукенова жақында Мәжілісте ұсынылған “Қазақстан Республикасындағы сайлау туралы” заң жобасына түсініктеме берді, деп хабарлайды “ҚазАқпарат” ХАА.
“Тікелей сайлауға қатысты мәселе бұрыннан бері талқыланып келеді. Бұл демократиялық қоғамның белгілерінің бірі, ол азаматтардың белсенділігін арттырады. Яғни, халық өз өңірінің даму процесіне қатысқысы келмейтіндігін “бәрібір бізден сұрмайды, біздің пікірімізді сұрамай-ақ әкімдерді тағайындайды”, – деп негіздейді. Бұл жерде азаматтардың тікелей қызығушылығы пайда болады, біз қазақстандықтардың белсенділігінің артуын қалаймыз. Кімді таңдайтындарын білуі керек, олардың елді мекенінің болашағы осы адамның іс-әрекетіне тікелей байланысты”, – деді Анар Байтукенова “ҚазАқпарат” ХАА тілшісіне телефон арқылы берген сұхбатында. Оның айтуынша, егер халық сенімін ақтай алмаса, әкімнің өкілеттігін халық алып тастау туралы сұрау салуға бастамашы бола алады. “Өзін-өзі басқару туралы айта отырып, әкім халыққа есеп беруі керек екенін атап өту керек, барлық шығындар жергілікті қоғамдастық жиналысында талқыланады. Сондай-ақ, әкімнің өкілеттігін алып тастау туралы сұрау салуға бастама жасауға құқық береміз. Біз азаматтарды қызықтырып, оларды өз ауылын, ауданын басқаруға тартқымыз келеді”, — деп атап өтті Анар Байтукенова. Сондай-ақ, спикер бастамаға жұмсалатын шығындар туралы айтты. “Әрине, белгілі бір шығындар талап етіледі-бұл, бірінші кезекте, өкілеттіктері аяқталатын әкімдердің санына байланысты. Мемлекет басшысының сайлауды екінші жартыжылдықта өткізу туралы тапсырмасы бар. Тиісінше, шығындарды есептеу кезінде біз сайлау учаскелерінің санын азайтып, сайлау комиссия мүшелерін барынша аз алдық. Яғни, есептеу кезінде шығындар барынша оңтайландырылды”, – деп қорытындылады А.Байтукенова. Естеріңізге сала кетейік, 13 сәуірде ҚР Парламенті Мәжілісінде “Қазақстан Республикасындағы сайлау туралы” Конституциялық заңға түзетулер енгізілген конституциялық заң жобасының тұсаукесері өтті. 15 қаңтарда мемлекет басшысы ауылдық округ әкімдерін сайлаудан кейін, ауыл әкімдерін сайлауға көшуге болатынын мәлімдеді. Мемлекет басшысының Жолдауын іске асыру жөніндегі Жалпыұлттық іс-шаралар жоспарында Қазақстанда ауыл әкімдерін сайлау 2021 жылы өтуі мүмкін екендігі атап өтілді.
