Ұлыбритания астанасында Британия аумағында тұратын біздің еліміздің азаматтары үшін “Отандастар қоры” КЕАҚ төртінші бизнес-форумы өтті. Бұл туралы ҚР сыртқы саяси ведомствосының баспасөз қызметі хабарлады.
ҚР Сыртқы істер министрлігінің ақпараты бойынша, форумның басты мақсаты Ұлыбританиядағы қазақ диаспорасы өкілдерімен іскерлік қарым-қатынас орнату болып табылады.
Қор Президентінің орынбасары Мағауия Сарбасов іс-шарада сөз сөйлеп, қатысушыларға “Отандастар” және дүниежүзі қазақтары қауымдастығының жұмысы туралы, сондай-ақ “Қазақ мәдени-іскерлік үйі” жобасы аясында барлық әлем бойынша іскер үйлер мен мәдени орталықтар желісін құру жоспарлары туралы айтты.
Форумда стартаптарды ынталандыру және өзара іс-қимыл тетіктері талқыланды, сондай-ақ Қазақстанның ауыл шаруашылығы өнімдерін британдық нарықтарда ілгерілету перспективалары қарастырылды.
Сонымен қатар, іс-шараға қатысушылар “Астана Опера” және “Астана Балет” сияқты мәдени және ұлттық брендтерді қолдау мәселелеріне ерекше назар аударды.
Қор өкілдері барлық қатысушыларды осы жылдың қараша айында Түркістан қаласында өтетін алғашқы отандастар форумына шақырды.
