Біздің Республикамыздың Қорғаныс ведомствосы бүгін Қазақстанның төртінші бітімгершілік ротасының құрамынан тағы бір топ әскери қызметшілер Ливанға жіберілгенін айтты.
Қорғаныс министрлігі коронавирус індетіне байланысты үшінші ротаны ауыстыратын төртінші бітімгер ротасын екі кезеңмен – тамыздың басында және ортасында жіберу туралы шешім қабылданғанын түсіндіріп айтты.
Бітімгершілік ротасы 120 әскери қызметшіден тұрады. Оның құрамына әскери десанттық-шабуылдаушылар ғана емес, өңірлік қолбасшылықтар да кірді.
Қорғаныс ведомствосының хабарлауынша, төртінші бітімгершілік ротасының құрамына енген барлық әскери қызметшілер Біріккен Ұлттар Ұйымының негізгі құжаттарының рәсімдері мен нормаларына сәйкес оқытылып, сыналды.
Ливанда біздің әскери қызметшілер халыққа көмек көрсетуге, жергілікті жерді торуылдауға және бекеттерде кезекшілікке тартылатын болады.
Бұған дейін 4 тамызда Ливан астанасының портында жарылыс болды деп хабарланған. Оқиға салдарынан адамдар қаза тауып, зардап шекті. Осы оқиғадан кейін Бейрутқа қазіргі уақытта зардап шеккендерге медициналық көмек көрсетіп жатқан қазақстандық әскери дәрігерлер тобы жіберілді.
Сурет: sputniknews.kz
