Demoscope қоғамдық пікірді жедел мониторингілеу бюросы біздің республикада «Қазақстандағы қашықтықтан білім беру» тақырыбында әлеуметтік сауалнама жүргізді. Бұл туралы ratel.kz ақпарат агенттігі жазады.
Сауалнама 6-9 қазан аралығында стационарлық нөмірлерге телефон соғу арқылы жүргізілді. Барлығы 14 өңірден және Республикалық маңызы бар қалалардан — Нұр-Сұлтан, Алматы және Шымкенттен 1100 адамнан сауалнама алынды.
Сауалнамаға қатысқан азаматтардың жалпы санының 43%-ы қашықтықтан оқыту форматына мүлдем қарсы екенін көрсетті. Респонденттердің 38%-ы онлайн оқытуға түсіністікпен қарайды, бірақ біздің басшылық жаңа оқу жылына жақсы дайындалуы керек деп санайды. Қазақстандықтардың тек 16%-ы ғана қашықтықтан оқытуды қолдады.
Сонымен қатар, әлеуметтік сауалнама респонденттердің басым көпшілігі, атап айтқанда 42%, қашықтықтан оқытудың тиімділігін орташа деңгейден төменге бағалағанын көрсетті. Бұл форматқа сауалнамаға қатысқан азаматтардың жалпы санының 12%-ы ғана жоғары баға берді.
Бұған дейін Үкімет басшысы Асқар Мамин қазіргі уақытта уәкілетті мемлекеттік органдар дәстүрлі оқыту форматына кезең-кезеңімен көшу мәселесін пысықтап жатқанын айтқан болатын.
Сурет: gazeta.ru
