Қазақстан Министрлер кабинетінің басшысы Асқар Мамин «азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы «Қазақстан Республикасы Үкіметінің 2015 жылғы 31 желтоқсандағы № 1193 қаулысына толықтырулар енгізу туралы» Қаулыға қол қойды, оған сәйкес коронавирустық инфекциямен күреске тартылған әскери медицина қызметкерлеріне ақшалай үстемеақы мөлшері белгіленеді.
Коронавируспен күресетін әскери дәрігерлер үш қауіп тобына бөлінеді. Дәрігерлердің бірінші тобына ең төменгі 20 жалақы немесе 850 мың теңге мөлшерінде үстемеақы қарастырылған. Екінші тәуекел тобындағы дәрігерлерге ең төменгі 10 жалақы немесе 425 мың теңге мөлшерінде үстемеақы төленеді. Үшінші топтағы дәрігерлерге 5 ЕТЖ немесе 212,5 мың теңге төленеді. Үстемеақылар төлеу тәртібін денсаулық сақтау саласындағы уәкілетті орган айқындайды.
«Осы қаулы алғашқы ресми жарияланған күнінен кейін он күнтізбелік күн өткен соң қолданысқа енгізіледі және 2020 жылғы 1 сәуірден бастап туындаған құқықтық қатынастарға қолданылады», — делінген құжатта.
Сурет: vlast.kz
