Маңғыстау облысындағы “Батыс” өңірлік қолбасшылығының “Оймаша” полигонында әуе шабуылына қарсы қорғаныс бөлімшелерінің лагерьлік жиыны аяқталды, деп “ҚазАқпарат” ХАА ҚР Қорғаныс министрлігінің баспасөз қызметіне сілтеме жасап хабарлайды.
Ақтау, Ақтөбе және Атырау гарнизондарының әуе шабуылына қарсы қорғаныс бөлімшелерінің 200 әскери қызметшісі мен 50 әскери техникасы іс жүзінде жауынгерлік мақсаттағы мәселелерді пысықтады.
Әскери қызметшілер ЗУ-23-2 зениттік қондырғыларынан және тасымалданатын зениттік-зымыран кешенінен жауынгерлік және оқу-жаттығу атыстарын, зениттік-артиллериялық взводтар атыстарын және зениттік дивизионның тактикалық жаттығуларын орындады, сондай-ақ жауынгерлік үйлестірудің соңғы кезеңін пысықтады.
Жиын барысында ең дайындалған бөлімшелерді анықтайтын конкурс өткізілді. Әскери қызметшілер зениттік артиллерияның атыс курсының теориялық ережелерін білуін және тактикалық және арнайы даярлық бойынша нормативтердің орындалуын көрсетті.
“Батыс” өңірлік қолбасшылығының әуе шабуылына қарсы қорғаныс әскерлерінің бастығы подполковник Руслан Нұрахметовтың айтуынша, Атырау қаласы әскери бөлімінің зенитшілері үздік бағытқа ие болды.
Өткізілген жауынгерлік атыстар мен тактикалық оқу-жаттығулардың нәтижелері бойынша зениттік бөлімшелердің командирлері оларды жауынгерлік әзірлікке келтіру кезінде, жауынгерлік іс-қимылдарды дайындау және жүргізу кезінде әскерлерді басқаруда жаңа практикалық тәжірибе алды. Зениттік дивизиондардың тактикалық жаттығулары ең жақсы дайындығы бар бөлімшелерді анықтауға, сондай-ақ әуе шабуылына қарсы қорғаныс әскери қызметшілерін даярлау жүйесін одан әрі жетілдіру үшін жұмыс жоспарын анықтауға мүмкіндік берді.
