Қазақстан Республикасы премьер-министрінің орынбасары Бердібек Сапарбаев зейнетақы жүйесін одан әрі жақсарту жөніндегі жұмыс тобының кезекті отырысын өткізді. Бұл туралы үкімет басшысының баспасөз қызметі хабарлады.
Отырыс жұмысына Еңбек және халықты әлеуметтік қорғау министрі Біржан Нұрымбетов, Білім және ғылым министрі Асхат Аймағамбетов, Сенат депутаты Мұрат Бақтиярұлы, Ұлттық банк төрағасының орынбасары Есжан Біртанов, «Атамекен» өкілдер палатасы төрағасының орынбасары Юлия Якупбаева, сондай-ақ мемлекеттік органдар мен үкіметтік емес ұйымдардың өкілдері қатысты.
Сондай-ақ отырысқа «БЖЗҚ» АҚ басқарма басшысы Жанат Құрманов қатысты. Қатысушылар алдында сөз сөйлеген ол, біздің республикада зейнетақы жүйесін жетілдіруді кешенді талдау бойынша актуарлық есептеулерді жүргізу нәтижелері туралы хабарлады.
Өз кезегінде еңбек және халықты әлеуметтік қорғау министрі зейнетақы жинақтарының бір бөлігін тұрғын үй сатып алуға немесе білім алуға мақсатты пайдалану бойынша жұмыс тобының ұсынысын айтты.
Сонымен қатар, кездесу барысында мемлекеттік кіріс комитеті басшысының орынбасары Талғат Мамаев міндетті әлеуметтік төлемдердің уақытылы төленуін бақылауды күшейту бойынша қабылданып жатқан шаралар туралы хабардар етті.
Отырыс соңында жұмыс тобы жыл соңына дейін Қазақстандағы зейнетақы жүйесін жақсартуға бағытталатын ұсыныстар әзірлейтінін атап өтті.
