Қазақстанның премьер-министрі Асқар Маминнің төрағалығымен еліміздің астанасын дамыту мәселелері жөніндегі мемлекеттік комиссияның отырысы өтті. Бұл туралы үкімет басшысының баспасөз қызметі хабарлады.
“Елбасының тапсырмасы бойынша елорданы дамытудың өзекті мәселелерін шешу, соның ішінде білім беру, денсаулық сақтау нысандарын салу, көлік инфрақұрылымын дамыту бойынша Нұр-Сұлтан қаласын дамытудың бес жылдық кешенді жоспары әзірленіп, бекітілді”, – деді Мамин.
Отырыс кезінде оның қатысушылары Нұр-Сұлтан құрылысының кешенді жоспарын жүзеге асыру мәселелерін қарастырды. Сондай-ақ, газбен жабдықтау, қала шеттерін дамыту, үлестік құрылыс мәселелері қозғалды.
Үкімет басшысы 2019 жылдың ағымдағы кезеңінде құрылыс қарқынының көрсеткіші 20%-ға төмендегенін айтты.
Астанада тұрғын үйге деген сұраныс жоғары болған жағдайда тұрғын үй құрылысы қарқыны төмендеуі тиіс емес”, – деді Асқар Мамин.
Премьер-министрдің ақпараты бойынша, елорданың негізгі капиталына салынған инвестициялар 20%-ға, ал тұрғын үйлерді пайдалануға беру 33%-ға төмендеді.
“Үкімет Астананы кешенді дамытуды іске асыру үшін барлық қажетті шараларды қабылдады. Елорда әлеуметтік-экономикалық даму көрсеткіштеріне қол жеткізу жағынан барлық өңірлер үшін үлгі болуы керек”, – деді Мамин.
Бүгінгі күні қала шеттерін дамыту өзекті мәселе болып табылады. Елорда әкімдігінің өкілдері биылғы жылы Нұр-Сұлтанның шеттерін дамытуға бағытталған тоғыз жобаны жүзеге асыру жоспарланғанын айтты.
Нұр-Сұлтан қаласы шетіндегі мәселелерді шешуге үш жылдық кезеңге 22,5 млрд теңге қарастырылған, бұл қаражатты қала шетіндегі тұрғындардың өмір сүру сапасын арттыру үшін пайдалану қажет”, – деп толықтырды премьер-министр.
Мемлекеттік комиссия отырысының соңында Асқар Мамин Астана әкімдігіне мүдделі органдармен бірлесіп кешенді жоспарды жүзеге асыруды уақтылы және сапалы орындауды, сондай-ақ қала шетіндегі нысандарды салу бойынша жоспарды әзірлеуді тапсырды.
