Қазақстанның Премьер-министрі Асқар Мамин Үкімет отырысы кезінде өңірлер мен қалалардың әкімдеріне алдағы оқу жылына барлық оқу мекемелерін дайындауды тапсырды. Бұл туралы Үкімет басшысының баспасөз қызметі хабарлады.
«1 қыркүйекке дейін аз уақыт қалды. Көріп отырғаныңыздай, дереу шешім талап ететін мәселелер бар. Жалпы білім беру объектілеріне күрделі жөндеу жұмыстары аяқталған жоқ. Мектептердің тек 85 пайызы ғана оқу жылына дайын. Сондықтан әкімдерге міндет қоямын: барлық білім беру нысандары оқу жылының басында 100 пайызға дайын болуы керек», — деді Мамин
Сондай-ақ, премьер-министр еліміздің өңірлеріндегі мектептерді оқулықтармен қамтамасыз ету мәселесін шешу қажеттігін айтты.
«Шымкент қаласы мен Түркістан облысында уақытылы қаржыландырылмауынан оқулықтарды жеткізу мерзімінде өзгеріс бар. Қостанай, Павлодар, Ақмола, Қызылорда облыстарында оқулықтардың қажетті санын ала алмау қаупі бар. Асхат Қанатұлы, бұл мәселені ерекше бақылауға алыңыз», — деді Үкімет басшысы.
Сонымен қатар, Үкімет отырысында Асқар Мамин азық-түлік өнімдерін оқу мекемелеріне жеткізу мәселесін қозғады. Ол өз орынбасарына бұл мәселемен айналысуды тапсырды.
Балаларды мектептерге жеткізу және ыстық тамақтандыру мәселесі де толық шешілген жоқ. Басты мәселе — көліктің жетіспеушілігі. Әсіресе Түркістан, Солтүстік Қазақстан облыстарында. Республиканың 360-қа жуық мектебінде тиісті санаттағы оқушыларды тамақтандыру ұйымдастырылмаған. Өңірлер әкімдері бұл мәселелерді шешуі қажет. Гүлшара Наушақызы, сіз бақылауға аласыз», — деп қорытындылады Асқар Мамин.
