Қазақстан министрлер кабинетінің басшысы Асқар Маминнің төрағалығымен республикамыздағы төтенше жағдай режимін қамтамасыз етуге жауап беретін мемлекеттік комиссияның отырысы өтті, деп хабарлайды премьер-министрдің баспасөз қызметі.
Бейнеконференция байланысы режимінде өткен отырыс барысында Асқар Маминге елдегі санитарлық-эпидемиологиялық жағдай жайын, республика өңірлеріндегі жұмыспен қамтуды қамтамасыз етуге бағытталған қабылданып жатқан шаралар туралы ақпарат берілді.
Сонымен қатар, Үкімет басшысы жұмыс орындарын сақтау үшін отандық кәсіпорын басшылары қандай шаралар қолданып жатқаны туралы хабардар етілді.
Асқар Мамин өз кезегінде сыртқы нарықтардағы жағымсыз динамика аясында елдегі қолданыстағы өндірістерді сақтап, экспорттық позицияларды ұстап қалу басты басымдық болып табылатынын атап өтті.
Сондай-ақ отырыс аясында министрлер кабинетінің басшысы барлық деңгейдегі әкімдерге Қазақстан өңірлеріндегі әлеуметтік шиеленіске жол бермеуге бағытталған барлық шараларды қолдануды тапсырды.
Әкімдерге жұмыс орындарын сақтауға байланысты жасалған меморандумдарды өзектендіру, шағын және орта бизнеске қолдау көрсету шараларын қабылдау тапсырылды.
Сурет: Inform.kz
