Президенттің тапсырмасы бойынша құрылған қазақстандықтардың өмір сүру сапасын арттыру жөніндегі жұмыс тобы өз жұмысын бастады. Бұл туралы журналистерге Еңбек және халықты әлеуметтік қорғау министрі Мәдина Әбілқасымова мәлім етті.
Қазіргі уақытта жұмыс тобы қазақстандықтардан ұсыныстар жинауды бастады. Еліміздің өңірлерінде жедел штабтар құрылды, олар қазақстандықтардан ақпараттар және ұсыныстар жинайды.
«Біз сондай-ақ жұмыс тобына қоғам белсенділері өкілдерін, сарапшыларды шақыруды жоспарлап отырмыз. Менің ойымша, жұмыс тобы мемлекеттік қолдауды қажет ететін отбасыларды әлеуметтік қолдау мен қорғауды жақсарту бойынша кешенді шешімдер ұсынады. Қазіргі уақытта есептеу, бағалау жүргізілуде. Түрлі бағыттар бойынша көптеген ұсыныстар түсті: атаулы әлеуметтік көмек көрсетуді жақсарту, жәрдемақыларды қайта қарау, тұрғын үйге қол жетімділікті кеңейту мәселелері» — деді Мәдина Әбілқасымова.
Жұмыс тобының кезекті отырысын осы бейсенбі – 14 ақпан күні өткізу жоспарлануда.
Сулет: vperedgazeta.ru
