Қазақстан Үкіметі басшысының орынбасары Бердібек Сапарбаев Солтүстік Қазақстан облысына жұмыс сапарымен келді, онда Бәйтерек ауданының жұртшылығымен кездесті, деп хабарлайды Қазақстан Республикасы премьер-министрінің баспасөз қызметі.
Жұртшылықпен кездесу барысында премьер-министрдің орынбасары 2019 жылы атаулы әлеуметтік көмек төлеуге 146 миллиард теңге жұмсалғанын атап өтті.
Өз кезегінде еңбек және халықты әлеуметтік қорғау министрі Біржан Нұрымбетов елімізде 70 мыңнан астам адам атаулы әлеуметтік көмек алу үшін өз табыстарын жасырып қалғанын айтты.
“Жаңа жылдан бастап АӘК жаңа форматта тағайындауды жоспарлап отырмыз. Оны әр балаға шамамен 11 мың теңге көлемінде төрт және одан да көп баласы бар отбасылар алатын болады”, – деді ол.
Бердібек Сапарбаев министрдің сөзін тыңдап, жаңа форматтағы атаулы әлеуметтік көмек алатын отбасылар оны өз балаларының қажеттіліктеріне жұмсауы тиіс екенін ескертті.
“Ақшаны қайда жұмсағанын сұрасаң, үйлену тойын өткізіп, жаңа телефон сатып алған. Ақшаны балалардың қажеттілігіне ғана жұмсау керек-олардың тамақтануы, емделуі, білімі. 9 ай ішінде АӘК төлеуге мемлекет 146 миллиард теңге жұмсады. Егер өткен жылмен салыстырсақ, 2,5 есеге жуық өсті. Біздің есептеуіміз бойынша ауыл шаруашылығында 100 мың жұмыс орны, бизнесте 7 мыңға жуық жұмыс орны ашылды. 4 мыңға жуық отбасы тегін грант алды. Қазір бұл ақшаның қайда жұмсалатынын бақылайтын боламыз”, – деді Сапарбаев.
