Түркістан қаласында Түркістан облысының әкімі Жансейіт Түймебаевтың ресейлік Hevel Kazakhstan ЖШС-тің директоры Павел Агафоновпен кездесуі өтті. Кездесу барысында Кентау маңында күн электр станциясы құрылысының жобасы талқыланды. Бұл туралы Түркістан облыстық әкімдігінің баспасөз қызметі хабарлады.
Жоба 50 миллион америкалық долларға бағаланады. Нысан Қотырбұлақ ауылына жақын жерде салынады. Әкімдік 200 гектар аумақты бөледі.
Сонымен қатар, Ордабасы ауданында осындай құрылыс салынуы мүмкін.
2009 жылы құрылған “Хевел” компаниялар тобы – күн энергетикасына арналған жабдық, күн электр станцияларын құрастыратын және пайдаланатын және күн энергетикасы саласында ғылыми зерттеулер жүргізетін ең ірі ресейлік кәсіпорын.
Кәсіпорын аукционда Қазақстанның оңтүстік облыстарында құрылыс жүргізу құқығын ұтып алды. Жоба 2021 жылға дейін жүзеге асырылады.
Желтоқсан айында Мәскеу инвестициялық форумында “Түркістан” Әлеуметтік-кәсіпкерлік корпорациясы” акционерлік қоғамының филиалы, Turkistan Invest және “Хевел” Түркістан облысында күн электр станциясын салу туралы меморандумға қол қойды.
Сурет: inform.kz
