Мемлекет басшысы Қасым-Жомарт Тоқаев халыққа арнаған Жолдауында кейбір азаматтар зейнетақы жинақтарын тұрғын үй сатып алуға немесе медициналық қызмет алу үшін пайдалана алатынын айтты, деп хабарлайды newtimes.kz ақпарат ресурсы.
Президент халықтың әлеуметтік әл-ауқаты тұрғын үй мәселесімен тікелей байланысты екенін атап өтті. Алайда, барлық азаматтардың тұрғын үй сатып алу мүмкіндігі жоқ.
Осыған байланысты билік органдары салымшылардың зейнетақы жинақтарының бір бөлігін пайдалана алуы мәселесін пысықтады. Нәтижесінде мұндай бастаманы мақұлдау туралы шешім қабылданды.
Қасым-Жомарт Тоқаевтың айтуынша, келесі жылы Бірыңғай жинақтаушы зейнетақы қорының 700 мың салымшысы тұрғын үй сатып алу үшін өз жинақтарының бір бөлігін пайдалануға мүмкіндік алады.
Сондай-ақ, республика басшысы зейнетақы жинақтарының бір бөлігі медициналық қызмет алуға жұмсалуы мүмкін екенін атап өтті.
Тоқаевтың айтқан бастамасын сапалы іске асыру мақсатында Үкіметке барлық қажетті құқықтық актілерді қабылдау және дайындық жұмыстарын жүргізу тапсырылды.
Сурет: kaztag.kz
