Қарағанды облысының ауыл тұрғындары экологтарға өзендегі және топырақтағы «кара су» туралы шағымданды, олардың айтуынша, оны «KAZ Ferrit» ЖШС ағызып жатыр, деп хабарлайды “ҚазАқпарат” ХАА.
«Қарағанды облысының Экология департаментіне Куряновский кентінің тұрғындарынан «KAZ Феррит» ЖШС-сы ластанған кір суды тұрақты түрде жер бетіне ағызады, оның нәтижесінде Веснянка өзені мен топырақты, өзеннің төменгі ағысымен жайылымдағы шөптерді ластайтындығы туралы ұжымдық өтініш түсті», – делінген Қазақстан Республикасы Экология, геология және табиғи ресурстар министрлігінің Telegram-дағы хабарламасында.
Министрлікте хабарлағандай, аталған факті бойынша Қарағанды облысы экология департаментінің қызметкерлері жергілікті жерге барып, суды ластаушы заттардың бар-жоғын анықтау үшін су және топырақ сынамаларын алды.
Қазіргі уақытта аталған талдаулар жүргізіліп жатыр. Нәтижелері қосымша хабарланады. Сонымен қатар, “KAZ Феррит” ЖШС-на қатысты жоспардан тыс тексеру ұйымдастыру мәселесі қарастырылуда. Қорытындысы туралы қосымша хабарланады.
