Қазақстанның Мысырдағы төтенше және өкілетті елшісі Арман Исағалиев Каирде өткен қауіпсіздік бойынша Мюнхен конференциясына қатысты.Бұл туралы Қазақстан Республикасы сыртқы саясат ведомствосының баспасөз қызметі хабарлайды.
Қазақстан сыртқы істер министрлігінің ақпараты бойынша, форумға Египет, Бахрейн, Нигер, Уганда, Джибути және басқа да бірқатар мемлекеттердің сыртқы саяси ведомстволарының басшылары, сондай-ақ Таяу Шығыс, Африка, Еуропа елдерінен 60-тан астам саясаткерлер, сарапшылар, халықаралық және қоғамдық ұйымдардың өкілдері қатысты.
Жоғарыда көрсетілген кеңестің басты тақырыбы заңсыз көші-қон, лаңкестіктің таралуы, климаттың өзгеруі және киберқауіпсіздік мәселелері болды. Атап айтқанда, тараптар Судандағы өтпелі кезеңде бейбіт жағдайды, еркін сауда туралы африкалық континенттік келісім бойынша қауіпсіздікті қолдауға қатысты мәселелерді қарады. Сонымен қатар, Ливиядағы жағдай және Африка мүйізі аймағындағы қауіпсіздік мәселелері талқыланды.
Форум соңында қатысушылар қауіпсіздік жөніндегі Мюнхен конференциясының келесі кеңесі 2020 жылдың 28-29 қазанында Доха қаласында өтеді деген ортақ пікірге келді.
