Шағын және орта бизнес өкілдері мемлекет басшысы Қасым-Жомарт Тоқаевқа жүгініп, одан қолдау сұрайды. Бұл туралы “ҚазТАГ” ақпарат ресурсы хабарлады.
Бизнесмендер коронавирус індетіне байланысты енгізілген шектеулер олардың қызметіне теріс әсер еткенін, нәтижесінде олардың кейбіреулері қазір жұмысын қайта бастауға мүмкіндігі жоқ екенін айтты.
Осыған байланысты кәсіпкерлер коронавирус инфекциясының салдарын жеңуге көмектесетін бірқатар ұсыныстар жасады. Олардың бірі – қолданыстағы несиелерді жылдық 20%-дан 5-7%-ға дейін қайта қаржыландыру.
Сонымен қатар, шағын және орта бизнес өкілдері жалдау төлемдерінің мөлшерін азайтуды және салық жүктемесін бес жыл мерзімге арттыруға мораторий жариялауды ұсынады.
Бизнесмендер Қасым-Жомарт Тоқаевты салықтық демалысты ұзартуға, сондай-ақ, шағын және орта бизнес нысандарына қатысты тексерістерді келесі жылдың соңына дейін тоқтатуға шақырады.
Кәсіпкерлер Қазақстан көшбасшысынан олардың ұсыныстарын қарап, қолдау көрсетуін сұрайды. Ал, бизнесмендер, өз кезегінде, жұмыс орындарын сақтап, салықты тұрақты төлеуге уәде береді.
Сурет: fergana.news
