Соңғы онжылдықта елімізде жол қозғалысы саласына әлемдік стандарттар мен нормативтерді енгізу бойынша жүйелі жұмыс жүргізілді. Бұл туралы ҚР Премьер-министрі Асқар Мамин мәлімдеді, деп «ҚазАқпарат»ХАА хабарлайды.
«Қазақстан аталған саладағы сегіз негізгі халықаралық шарттардың қатысушысы болды, оларды ескере отырып, «жол жүрісі туралы»Қазақстан Республикасының Заңы қабылданды. БҰҰ-ның жол жүрісі туралы конвенциясы мен қабылданған Заңды ескере отырып, заңға тәуелді құқықтық актілер қайта қаралды, сондай-ақ жеті санаты және алты кіші санаты бар жүргізуші куәліктерінің жаңа үлгілері енгізілді. Ұлттық заңнаманы одан әрі жетілдіру аясында ағымдағы жылдың ақпан айында «Қазақстан Республикасының кейбір заңнамалық актілеріне жол қозғалысы мәселелері бойынша өзгерістер мен толықтырулар енгізу туралы» Қазақстан Республикасының Заңы қабылданды», — деп жазды Асқар Мамин депутаттық сауалға берген жауабында. Бұдан басқа, жол инфрақұрылымын дамыту және жаңғырту бойынша шаралар кешені іске асырылуда, оның ішінде автожолдарды І техникалық санатқа ауыстыру, түрлі деңгейдегі көлік жол айрықтарын, жерасты және жерүсті жаяу жүргіншілер өткелдерін салу, жол қозғалысын бақылаудың автоматтандырылған жүйелерін кеңейту және т.б. бойынша «ішкі істер органдары көше-жол желісін жүргізген зерттеулердің нәтижелері бойынша анықталған кемшіліктерді жою бойынша 25 мыңнан астам нұсқама берді, 3 мыңнан астам лауазымды адам әкімшілік жауапкершілікке тартылды», — деп түйіндеді.
