ҚР ҰҚК трансұлттық есірткі тобын жою туралы айтып берді.
2019 жылдың соңынан 2020 жылдың қазанына дейін Қазақстан Республикасы ҰҚК Қазақстанға шетелден синтетикалық есірткілерді жеткізуді, сондай-ақ оларды “Борат24″ интернет-дүкені арқылы дайындауды және өткізуді жүзеге асыратын трансұлттық қылмыстық топ қызметінің жолын кесу бойынша ауқымды операция жүргізді”, — делінген ведомствоның баспасөз қызметінің хабарламасында.
2019 жылдың қараша айында Көкшетауда әлеуметтік желілер арқылы синтетикалық есірткі таратқан бес аймақтық өткізуші ұсталды. Ағымдағы жылдың 26 сәуірінде Степногор қаласында синтетикалық есірткі дайындау зертханасы жойылды. Ұсталғандардың әрекеттерін “Борат24” интернет-дүкенінің үйлестірушісі басқарғаны анықталды.
Операция қорытындысы бойынша трансұлттық есірткі құрылымының 34 қатысушысы ұсталып, сегіз есірткі зертханасы жойылды. Еліміздің ірі қалалары – Нұрсұлтан, Алматы және Шымкентке контрабандалық жолмен әкелінген 40 кг психотроптық заттар тәркіленді. Қара нарықта алынған есірткінің бөлшек сауда құнының шамамен алынған бағасы 600 млн теңгені (80 мың доза) құрайды.
Сонымен қатар, заңсыз криптобиржалардың қызметі тоқтатылды, олар есірткіні сатудан түскен ақшаны биткоиндерді сатып алу және оларды шетелге шығару бойынша қаржылық операцияларды жүргізу арқылы заңдастыруды ұйымдастырды. Бұл ретте алынған ақшаны жария ету үшін құрылған алты жылжымалы “майнинг фермасы” анықталды. Есірткі құрылымының көмекшілері екі жыл ішінде (2018 жылғы қаңтардан 2019 жылғы желтоқсанға дейін) 2,5 млрд теңгеден астам сомаға қаражатты жария етті.
Көрсетілген фактілер ҚР ҚК 297-б.4-т., 264-б. 2-т., 286-б. 4-т. және 218-б. 3-т. бойынша тіркелді.
Сурет: zakon.kz
