Қазақстан Республикасы Ішкі істер министрлігінің басшысы Ерлан Тұрғымбаев 21-22 наурызда Астана, Алматы және Шымкент қалаларында өткен митингілерде ондаған азаматтардың ұсталуы туралы ештеңе білмейтінін айтты.
«Мен ондайды естіген жоқпын», — деді ол журналистерге Үкімет отырысынан кейін.
Естеріңізге сала кетейік, 21 және 22 наурызда көптеген адамдар, соның ішінде журналистер де, Астана атын өзгертуге қарсы және басқа да әлеуметтік, саяси және экономикалық мәселелер бойынша жиналған митингілерде ұсталған ондаған адам туралы хабарланған болатын.
Сондай-ақ, бұқаралық ақпарат құралдарының қызметкерлеріне ұстау орындарында жұмыс істеуге кедергі келтіргені, ұстауда полиция тарапынан бұзушылықтар жасалғаны хабарланды.
21 наурызда Астананың полиция қызметкерлері қала әкімінің ғимаратының алдында қаланың атын Нұр-Сұлтан деп өзгертуге қарсы наразылық білдіруге тырысқан,шамамен, жиырма азаматты ұстады. «Шекарасыз репортерлер» халықаралық беделді ұйымы журналистерді ұстауға қатысты түсініктеме беріп,Қазақстан билігінен журналистерге қысым жасамауды талап етті.
«ҚазТАГ» халықаралық ақпараттық агенттігінің редакциясы жұма күні ІІМ басшысының кеңесшісі – ведомствоның ресми өкілі Нұрділдә Ораздан түсініктеме беруді сұрады. Ол кейін қамауға алу туралы түсініктеме беруді уәде етті, бірақ уәдесін орындамады.
Сурет: RFE.RL
