Тегеран үстінде құлаған украиналық жолаушылар лайнерін ирандық ракета кездейсоқ атып түсірген. Бұл туралы Иран Қарулы Күштерінің Бас штабынан мәлімдеді.
Иран Бас штабының мәлімдеуінше, Иран Ирактағы американдық базаларға зымыраннан соққы жасаған соң, АҚШ әскери ұшақтарының ұшу саны артты, сондықтан Иранның қарулы күштері америкалықтар тарапынан жауап соққысын күтті, бұл Иранның қорғаныс бөлімшелерінің әуе шабуылына қарсы жоғары жауынгерлік дайындықта тұруына себеп болды.
Украина әуе компаниясының жолаушылар лайнері адамның жіберген қателігінен атылып, Иран, Украина, Канада, Германия, Швеция және Ауғанстан азаматтарының қаза болуына алып келді.
Иран бас штабының мәлімдеуінше, әуе кемесі ұшу кезінде Иранның әскери нысандарының біріне тым жақын ұшты, сонымен қатар, Иран әскери қызметшілерінің айтуынша, ұшақтың сыртқы түрі жау кемесіне өте ұқсас болды.
Өз кезегінде, Иран дипломатиялық ведомствосының басшысы Мохаммад Джавад Зариф Тегеран түбіндегі ұшақ апатының себебі “адами фактор” екенін атап өтті.
“Қайғылы күн. Қарулы Күштерді ішкі тексерудің алдын ала қорытындыларына сәйкес: АҚШ-тың “авантюризмі” салдарынан дағдарыс кезеңінде жіберілген “адами қателік” украиналық ұшақтың апатқа ұшырауына себеп болды”, — деді ол.
