Арыс қаласына 45 қарағандылық мамандар мен сарапшылар келді. Олар ғимараттар мен тұрғын үйлерді тексерді. Және қажет болған жерлерде қалпына келтіру жұмыстарына кірісті.
Үйлерді тексеру үшін қосымша төрт компания тартылды. Бүгінгі күні 200 адам жұмылдырылып, шатырлы қалашық салынды. Әр отбасына облыс әкімдігінің жауапты қызметкерлері бекітілді.
Қалпына келтіру жұмыстары 20 нысанда жүргізілуде. Толық бұзылған, авариялық құрылыстар жоқ. Көп қабатты және жеке тұрғын үйлерде шатырды жөндеу, терезе жақтаулары мен шыны пакеттерін ауыстыру қажет. Сондай-ақ одан әрі есептеп, өтемақы төлеу үшін пәтерлердің ішкі зақымдануы бағаланады.
Жұмыстар барынша жедел мерзімде аяқталатын болады.
Алғашқы күннен бастап Қарағанды облысы Арыс қаласында зардап шеккендерге көмек көрсетуге белсенді қатысты. 24 маусымда Қарағандыдан 10 тонна гуманитарлық жүк, 28 маусым – қосымша тағы 15 тонна жөнелтілді. Қайырымдылық қорына 12 млн. теңге аударылды.
