Қазақстанның Индустрия және инфрақұрылымдық даму министрлігінің басшысы Бейбіт Атамқұлов Қазақстан-Қырғыз шекарасындағы «Сартөбе» және «Аухаты» екі өткізу пункті кеңейтілетінін ацтты.Оның айтуынша, бұл шекарадан өтуді жеңілдетеді.
«Жұмыс істеп тұрған 7 өткізу пункті арқылы жылына 11 миллион адам мен 466 мың көлік құралы өтеді. 2018 жылы елдер арасындағы автокөлікпен жүк тасымалдау көлемі 43 пайызға артып, 1,7 миллион тоннаны құрады. Хаттамада «Сартөбе» және «Аухаты» автомобиль өткізу пункттерінің мәртебесін екіжақты қатынастан көпжақты халықаралық жүйеге ауыстыру көзделген. Бұл шара «Қарасу» және «Қордай» пункттерін жеңілдетеді, осылайша сауда-экономикалық қатынастардың одан әрі дамуын жақсартады», – деді министр.
Сондай-ақ, Бейбіт Атамқұлов «Нововоскресеновка – автодорожный» өткізу пункті «Сыпатай-автодорожный»деп өзгертілетінін хабарлады.
«Әсіресе Қырғыз Республикасына баратын азаматтарымыз үшін жеңілдік болады. Өте оңай және жылдам өтеді. Жазда, әсіресе «Кордайда» үлкен кептелістер болады. Қазір біз бұл кептелістерді азайтамыз. «Қордай» өткізу пунктін жаңғырту бойынша қараша айында байқау жұмыстары өтеді. 2020 жылы біз осы өткізу пунктін толық жаңғыртатын боламыз», – деді Атамқұлов.
Сонымен қатар, индустрия министрі Шу өзені арқылы өтетін көпір құрылысының жоспары туралы айтты. Мұнда өзен бойымен өту үшін қосымша жол жасалады.
«Қасында «Қарасу» өткізу пункті бар. Қазір бір көпірден автокөлік те, азаматтар да өтеді.Көпір бұл ағысты жеңілдетеді», — деді Бейбіт Атамқұлов.
