ҚР ІІМ – де “Işkı ıster ministrlıgı – “Adaldyq alańy” жобасы таныстырылды, оның миссиясы-тұрмыстық сыбайлас жемқорлық деңгейін қысқарту және халықтың ішкі істер органдарына сенімін арттыру. Бұл туралы “ҚазАқпарат” ХАА министрліктің баспасөз қызметіне сілтеме жасап хабарлайды.
Миссияны орындау үшін ІІМ тәжірибелі қызметкерлерінен және қоғамнан жобалық команда құрылды. Команда үнемі ұсыныстар жинауды жүзеге асырады, сыбайлас жемқорлыққа ықпал ететін себептер мен жағдайларды жою бойынша жаңа тәсілдер мен шешімдерді қалыптастырады, әзірлейді. Олардың барлығы қоғамдық талқылауға шығарылып, алқалы түрде қаралатын болады. Жобаны қоғам қайраткері, Еуропадағы қауіпсіздік және Ынтымақтастық Ұйымының (ЕҚЫҰ) полиция реформасы жөніндегі кеңесшісі Эльмира Хисамутдинова басқарды. “Adaldyq alańy” жобасы тікелей ІІМ фронт-офисінен басталады, онда азаматтар үшін барлық қолайлы жағдайлар жасалған. Айта кету керек, қазіргі уақытта аумақтық бөлімшелерде Азаматтарға арналған 252 қабылдау бөлмесі ашылды, онда білікті мамандар халыққа консультативтік-құқықтық көмек көрсетеді. Бұдан басқа, ІІМ-нің “1402”Бірыңғай сенім телефоны жұмыс істейді. Азаматтар орын алған сыбайлас жемқорлық құқық бұзушылық, сондай-ақ ішкі істер органдары қызметкерлерінің тарапынан басқа да заңсыз әрекеттер туралы хабарлай алады.
“Adaldyq alańy” жобасын жасай отырып, біз ІІМ үшін ашықтық пен айқындылық, сыбайлас жемқорлыққа қарсы жоғары мәдениет пен халықтың сенімі басым болып табылатынын растаймыз. Жалпы, жоба ІІМ мен қоғам арасындағы байланыстырушы көпір болады”, – деп Министрдің орынбасары Алексей Калайчиди атап өтті.
Жобаны таныстыру барысында ішкі істер министрінің орынбасары Алексей Калайчиди мен сыбайлас жемқорлыққа қарсы қызмет төрағасының бірінші орынбасары Олжас Бектенов сыбайлас жемқорлықтың алдын алудағы ынтымақтастық және оны тудыратын себептер мен жағдайларды жою жөніндегі бірлескен іс-қимыл мәселелерін талқылады. “Мемлекеттік басқару жүйесіндегі полицияның рөлін асыра бағалау қиын. Осыған байланысты Ішкі істер органдары жүйесінде парасаттылық, ашықтық, адалдық қағидаттарын ілгерілету аса маңызды болып табылады”, – деп О.Бектенов атап өтті.
