ҚР Ішкі істер министрі Ерлан Тұрғымбаев Министрлер Кабинетінің отырысына қатысып, құқық қорғау органдарының карантиннің күшейтілуіне дайындығы туралы айтты, деп хабарлайды forbes.kz ақпарат ресурсы.
Тұрғымбаев өз сөзінде қазіргі уақытта өзі басқарып отырған ведомство карантин режимінің белгіленген талаптарының сақталуын бақылауды жүзеге асыруда денсаулық сақтау органдарына жәрдем көрсетіп жатқанын мәлімдеді.
ІІМ басшысының айтуынша, бұл жұмысқа Ішкі істер органдарының 10 мыңға жуық қызметкері мен Ұлттық ұланның жауынгерлері жұмылдырылған.
Сондай-ақ, Тұрғымбаев карантин ережелерін бұзғандарды анықтау бойынша жүргізіліп жатқан жұмыстардың нәтижелері туралы айтты.
«Денсаулық сақтау органдарымен және жергілікті атқарушы органдармен қызмет көрсету нысандары бойынша бес мыңнан астам бірлескен рейдтер өткізілді. 28 мыңнан астам карантин тәртібін бұзушылар, оның ішінде 4 600 — ден астам сауда орталықтарында, дүкендер мен базарларда, 1 700 мейрамханада, кафе және басқа да демалыс орындарында анықталды», — деді министр.
Ол республикамызда карантиндік шаралар қайтадан қатайтылатын болса, оған құқық қорғау органдары дайын екенін ерекше атап өтті.
Бұған дейін Денсаулық сақтау министрі Алексей Цой карантин режимі жеңілдегеннен кейін, қазақстандықтар белгіленген ережелерді жиі бұза бастағанын айтқан болатын. Сондықтан, егер бұл жалғасатын болса, елде тағы да карантинді күшейтуге тура келеді.
Сурет: sputniknews.kz
