2018 жылдың желтоқсан айының ортасына дейінгі жағдай бойынша 91 бала жауынгерлік іс-қимыл аймағынан оралды. Бұл туралы ҚР Білім және ғылым министрлігінің балалардың құқықтарын қорғау Комитеті төрағасының міндетін атқарушы Ержан Ерсайынов мәлім етті.
“Оның ішінде мектепке дейінгі жастағы – 35, мектеп жасындағы – 56. Жалпы санынан 28 бала әлеуметтік төлем мен жәрдемақы алады”, – деді Ержан Ерсайынов Астанада ланкестік белсенділік аймақтарынан оралған отбасыларынан шыққан кәмелетке толмағандар балаларды оңалту және ақтау жөніндегі республикалық кеңесте.
Оның айтуынша, кәмелетке толмаған балалар “қоғамға қауіпті емес, олар әскери әрекеттерге тікелей қатыспаған”. ” Ата-аналар алып кеткен қуғын-сүргін құрбандары ретінде қараймыз. 2016, 2017 жылдары қайтарылған балалар да бар. Бұлардың бәрі 2016 жылдың соңына дейін қайтарылған балалар деп айтуға болады”, – деп атап өтті Ержан Ерсайынов.
Оның айтуынша, 21 балаға құжаттарын ресімдеумен көмек берілді, анасы сотталған төрт бала жақын туыстары тарапынан қамқорлыққа алынды.
“40 ата-ананың 13-і жұмысқа орналастырылды, үш жасқа дейінгі балалары бар 13 адам жұмыс істемейді. 14 адам жұмысқа орналастырылған жоқ. Олардың ішінде алтауына кәсіби дайындық курстарынан өтуге көмек көрсетілді”, – деп атап өтті Ержан Ерсайынов.
Министрліктің өкілі ағымдағы жылдың тамыз айынан бастап ланкестік белсенділік аймақтарында болған кәмелетке толмағандарды ақтау және оңалту орталықтарын құру жөніндегі жоба іске қосылғанын атап өтті. Бүгінде елімізде осындай тоғыз орталық жұмыс істейді, 2019 жылы тағы үш орталық құру жоспарлануда.
“Орталықтың қызметімен балалар мен ата-аналар, сондай-ақ заңмен байланысты қатер тобына жататын балалар қамтылған. Орталықтарда тұрақты мекен-жайы анықталғанға дейін отбасыларға арналған уақытша тұрғын үй қызметін атқаратын қонақ үйлер бар”, – деп нақтылады ол.
Cулет: abctv.kz
