Бүгін Қазақстан басшысы Қасым-Жомарт Тоқаевтың BayWa AG неміс компаниясының басқарма төрағасы Клаус Лутцпен кездесуі өтті. Бұл туралы ҚР Президентінің баспасөз қызметі хабарлады.
Кездесу Қасым-Жомарт Тоқаевтың қауіпсіздік конференциясына қатысу үшін Мюнхенге сапары аясында өтті.
Неміс компаниясының басшысымен әңгіме барысында Қазақстан Президенті Мюнхенге конференцияға қатысу үшін ғана емес, бірқатар компаниялардың өкілдерімен кездесу үшін де келгенін атап өтті.
Клаус Лутц өз кезегінде Қазақстан Республикасының басшысына компаниясының немен айналысатынын айтып, қазақстандық кәсіпкерлермен ынтымақтастыққа мүдделі екендігін мәлімдеді.
BayWa AG – ауыл шаруашылығы, құрылыс және энергетика салаларына мамандандырылған Германия компаниясы. Сонымен қатар, ол осы салаларда сауда және стратегиялық қызметтер көрсетеді.
Бұл компания 14 мемлекетте жұмыс істейді. Оның айналымы 2018 жылы 16,6 миллиард еуроны құрады. Сонымен қатар, оның бүкіл әлемде орналасқан 290 еншілес компаниясы бар, онда 17 мыңға жуық қызметкер жұмыс істейді.
Сурет: Inform.kz
