Қазақстан сыртқы саяси ведомствосының басшысы Мұхтар Тілеуберді Берлинге ресми сапары аясында Германия экономикасы Шығыс комитетінің жаңа жылдық қабылдауына қатысты. Бұл туралы ҚР СІМ баспасөз қызметі хабарлады.
Қазақстандық сыртқы істер министрлігінің ақпараты бойынша, іс-шараға қатысушылар арасында Германия, Орталық Азия және Шығыс Еуропа елдері мемлекеттік органдарының өкілдері, сондай-ақ жетекші неміс компанияларының басшылары болды.
Жиналғандардың алдында сөз сөйлеген Мұхтар Тілеуберді Германия экономикасының Шығыс комитетіне екі мемлекет арасындағы іскерлік байланыстарды кеңейтуге қосқан қомақты үлесі үшін алғысын білдірді.
Сонымен қатар, министр Германия Қазақстанның Еуропалық Одақтағы негізгі серіктесі екенін атап өтті. Ол қазіргі уақытта 900-ге жуық неміс компаниясы елімізде жұмыс істеп жатқанын, осылайша Қазақстан экономикасының дамуына елеулі үлес қосып жатқанын айтты.
Неміс бизнес-топтарының өкілдері өз кезегінде біздің елмен экономикалық ынтымақтастықты нығайтуға, сондай-ақ қазақстандық жобаларды инвестициялауға мүдделі екенін мәлімдеді.
Германия экономикасының шығыс комитеті неміс бизнесінің мүдделерін қорғайтын ұйым болып табылады. Оның басты мақсаты – шетелде Герман бизнесін қолдау.
Сурет: Inform.kz
