Республикамыздың елордасының әкімі Алтай Көлгінов Франция кәсіпорындары қозғалысының өкілдерімен кездесу өткізді, онда автомобиль жасау саласындағы ынтымақтастықты дамытуға байланысты мәселелер қаралды. Бұл туралы қалалық әкімдіктің баспасөз қызметі хабарлады.
Сондай-ақ, кездесу барысында Қазақстан мен Франция арасындағы денсаулық сақтау және аэроғарыш өнеркәсібі саласындағы өзара қатынасты дамыту мәселелері талқыланды.
Сонымен қатар, келіссөзде екі ел арасындағы құрылыс және инвестициялар, тұрғын үй-коммуналдық инфрақұрылым салаларындағы ынтымақтастықты нығайту мәселелеріне назар аударылды.
Кездесуге қатысушылар алдында сөз сөйлеген Францияның Қазақстандағы Төтенше және Өкілетті Елшісі Филипп Мартинэ және Франция-Қазақстан Іскерлік кеңесінің тең төрағасы Ив-Луи Даррикарер Қазақстанмен жемісті ынтымақтастықты кеңейтуге қызығушылық танытты.
Өз кезегінде, Астана әкімі бүгінгі күні шетелдіктерге ағылшын тілінде мемлекеттік қызметтер ұсынатын, “Астана” халықаралық қаржы орталығының жұмысына ерекше назар аударды.
Сурет: astana.gov.kz
