Қазақстанның Бельгиядағы төтенше және өкілетті елшісі Айгүл Құспан Еуропарламенттің тоғызыншы шақырылымы біздің еліміздің бейресми достар тобын құрғанын айтты.
Оның айтуынша, бұл топты Еуропарламенттің алты фракциясынан он евродепутат құрды. Қазақстанның достары тобының басты мақсаты әлеуметтік және мәдени қатынастарды дамыту, сондай-ақ Еуроодақ пен біздің ел арасындағы сауда-экономикалық өзара іс-қимылды нығайту болып табылады.
“Еуропалық консерваторлар мен реформистер” фракциясының Еуропарламент депутаты Рышард Чарнецкий құрылған топ Еуропалық Одақ пен Қазақстан арасындағы қазіргі қарым-қатынастарға сүйенетінін атап өтті.
“Біз диалог пен ынтымақтастық үшін бейресми платформа ретінде әрекет ете отырып, әлеуметтік және мәдени қатынастарды дамытуға тырысамыз”, – деді еуродепутат.
Сонымен қатар, Рышард Чарнецкий Қазақстан достары тобы Еуропарламент пен Қазақстан Республикасының депутаттары арасындағы өзекті мәселелерді талқылау және диалог үшін қосымша алаң ретінде пайдаланылатынын айтты.
