Еуропалық одақ БҰҰ Даму Бағдарламасының (БҰҰДБ) арнайы жобасы үшін 2 миллион еуроға грант ұсынды, оның көмегімен Ауған әйелдері Қазақстан мен Өзбекстанның жоғары оқу орындарында білім ала алады. Бұл туралы Қазақстандағы ЕО баспасөз қызметі хабарлайды.
Ауғанстанда терроризм мен радикалды ислам өркендеп, әйелдерге толық білім алуға мүмкіндік бермейтіні белгілі. Сондықтан, ауған әйелдерінің тағдырын жеңілдету үшін, осы мемлекеттердің аумағында әйелдер өздерін қауіпсіз сезініп, бейбіт жағдайда тыныш оқи алады деп үміттене отырып, ЕО оларды Қазақстан мен Өзбекстанға оқуға жіберді.
Қазақстан мен Өзбекстанның жоғары оқу орындарында 2025 жылға дейін тау-кен ісі, қолданбалы статистика, сондай-ақ ауыл шаруашылығы бағыттарында бакалавриат, магистратура бағдарламалары бойынша шамамен 50 студент білім алатын болады.
«Ауғанстан халқы халықаралық қоғамдастық татуласу үдерісін қолдайтынын сезінуі тиіс деп есептеймін. Сондықтан да ЕО Орталық Азия мемлекеттерімен көршілес және өңір елдер арасындағы өзара байланысты орнатуға көмектесетін жобаларды қолдауға шешім қабылдады. Атап айтқанда, бұл ауғандық әйелдерді білім және жұмыспен қамтуға бағытталған жобалар», – деп есептейді ЕО Жоғарғы өкілі Федерика Могерини.
Осылайша, ЕО қазақстандық оқытушылардан білім алған әйелдердің көмегімен Ауғанстанда кәсіпкерлікті арттыруды жоспарлап отыр.
Сурет: Inform.kz
