Еуразиялық үкіметаралық кеңесте құжат тұжырымдамасын мақұлдады, оған сәйкес Еуразиялық экономикалық одаққа қатысушы елдердің шаруашылық жүргізуші субъектілеріне өзара іс-қимыл жасауға мүмкіндік берілді. Бұл туралы Еуразиялық экономикалық комиссияның баспасөз қызметі хабарлады.
«Үкіметаралық кеңес одақ елдерінің заңды тұлғаларының (шаруашылық жүргізуші субъектілердің) өзара және мүше мемлекеттердің уәкілетті органдарымен ақпараттық өзара іс-қимылын қамтамасыз ету үшін трансшекаралық ақпараттық өзара іс-қимыл тұжырымдамасын мақұлдады.
Тұжырымдаманы іске асыру электрондық цифрлық қолтаңбаны пайдалана отырып, бизнес пен мемлекеттік органдар арасындағы өзара іс-қимыл жасауға мүмкіндік береді деп болжануда. Инфрақұрылым субъектілеріне, осындай сервистерді қамтамасыз ететін операторларға қойылатын талаптар және басқа да ережелерді ЕАЭО елдері 2020 жылдың мамырына дейін әзірлеп, бекітеді деп күтілуде»,-деп хабарлады баспасөз қызметі.
Сондай-ақ, үкіметаралық кеңес мүшелері «ЕАЭО кедендік аумағы бойынша қауіпті қалдықтарды трансшекаралық өткізу туралы» келісімге қол қойды. Бұл құжат азаматтардың өмірі мен денсаулығын, сондай-ақ ЕАЭО мүше-мемлекеттерінің қоршаған ортасын қорғауды қамтамасыз ету үшін әзірленген.
ЕАЭО баспасөз қызметінің ақпараты бойынша, бұл келісім қалдықтарды трансшекаралық тасымалдаумен айналысатын жеке кәсіпкерлер болып табылатын заңды және жеке тұлғаларға таратылады.
