Қазақстан премьер-министрінің орынбасары Ералы Тоғжанов елімізде індеттің таралуының алдын алу мәселелеріне жауап беретін жедел штабтың отырысын өткізді, деп хабарлайды “ҚазАқпарат” жаңалықтар ресурсы.
Бейнеконференция байланысы арқылы өткен отырыс барысында Үкімет басшысының орынбасарына еліміздің мемлекеттік органдары коронавирустың таралуына қарсы бағытталған қабылданып жатқан шаралар туралы баяндады.
Денсаулық сақтау министрлігінің ақпараты бойынша, эпидемияға қарсы күрестің оң нәтижелері – екі аптада COVID-тің тәуліктік өсімін 4%-дан 2,3%-ға дейін төмендегені және сауыққандардың санын 60%-ға арттыруға қол жеткізгеніміз.
Елдегі эпидемиологиялық жағдай туралы баяндаманы тыңдап, Ералы Тоғжанов азаматтардың белгіленген карантин талаптарын сақтауына баса назар аударды.
Вице-премьердің айтуынша, бүгінгі таңда кейбір азаматтар әлі күнге дейін бетперде қолданбайды, себебі медициналық бетперделер коронавирустан қорғамайды деп санайды.
Сондықтан, Тоғжанов атап өткендей, Қазақстан өңірлерінде карантин режимі талаптарының сақталуын бақылауды күшейту қажет. Осыған байланысты ол COVID-19 эпидемиясы кезеңінде азаматтардың жүріс-тұрыс ережелерін әзірлеуді және күн сайын санитарлық нормаларды бұзуды анықтау бойынша рейдтер жүргізуді тапсырды.
Сурет: sputniknews.kz
