Қазақстанның Сыртқы істер министрлігінде USAID әкімшісінің Азия елдері бойынша көмекшісінің орынбасары Хавьер Пьедра мен Қазақстанның энергетика вице-министрі Сұңғат Есімханов өзара түсіністік туралы Меморандумға қол қойды. Бұл туралы АҚШ-тың Қазақстандағы елшілігінің баспасөз қызметі хабарлады.
Тараптар бұл шешім өңірдегі энергетикалық қауіпсіздік пен экономикалық тұрақтылықты арттыруға, қаражатты үнемдеуге, өңірдің энергетикалық саласына жаңа инвесторларды тартуға, сондай-ақ коммерциялық айналымды жеңілдетуге мүмкіндік беретінін атап өтті.
«CAREM интеграцияланған нарығы қаражатты үнемдеуге, энергетикалық қауіпсіздік пен экономикалық тұрақтылық деңгейін арттыруға ықпал етеді, сондай – ақ коммерциялық сауда процесін жеңілдетеді және Орталық Азияның барлық бес елі мен Оңтүстік Азияның көрші елдерінің энергетикалық секторына инвестиция тартады», — деді Хавьер Пьедра.
АҚШ-тың халықаралық даму жөніндегі агенттігі электр энергиясының тұрақты және экономикалық тиімді нарығын құруда Орталық Азия елдерін қолдайтын болады деп мәлімдеді.
«Электр энергиясының өңірлік нарығы әр елдің қажеттіліктерін қанағаттандыру және экономикалық және әлеуметтік дамуды қолдау үшін Орталық Азия елдерінде арзан электр энергиясын жеткізетін болады», – деп атап өтті агенттікте.
Сурет: inbusiness.kz
