Энергетика министрі Нұрлан Ноғаев Ақтөбе облысындағы мұнай компанияларындағы жағдайға қатысты депутаттық сауалға жауап берді, деп “ҚазАқпарат”ХАА тілшісі хабарлайды.
“Қазақстан Республикасының энергетика министрлігі сіздің шетелдік инвесторларға, кәсіпорын қызметкерлерінің еңбек құқықтарына, жалақы деңгейіне тексеру жүргізу және ол бойынша сәйкессіздіктерді жою, шетелдік жұмыс квоталары бойынша ұсыныстар қалыптастыру және Ақтөбе облысының мұнай компанияларындағы жағдайға байланысты шетелдік инвесторлардың Қазақстанның ұлттық мүдделерін сақтау талаптары жөніндегі сұрауыңызды қарап, келесіні хабарлайды. Қазақстан Республикасы энергетика министрлігінің жанында мұнай-газ, мұнай өңдеу және мұнай-химия салаларының әлеуметтік әріптестік пен әлеуметтік және еңбек қатынастарын реттеу жөніндегі Салалық комиссия жұмыс істейді, оның құрамына энергетика министрлігінің өкілдері, “KAZENERGY” қауымдастығы атынан жұмыс берушілер, сондай-ақ салалық кәсіподақтар атынан қызметкерлердің өкілдері кіреді. Салалық комиссияның отырысы тоқсан сайын өткізіледі”, — деп Нұрлан Ноғаев өз жауабында жазды.
Оның айтуынша, Салалық комиссия отырыстары аясында мұнай-газ саласы қызметкерлерінің әлеуметтік-еңбек қатынастарын реттеу, өңірлердегі еңбек жанжалдарының алдын алу бойынша қабылданып жатқан шаралар туралы мәселелер тыңдалады, мұнай-газ кәсіпорындарында қауіпсіз еңбек жағдайларын қамтамасыз ету мәселелері талқыланады. “2019 жылғы 22 қарашада Салалық комиссия отырысында Қазақстан Республикасының мұнай-газ, мұнай өңдеу және мұнай-газ химиясы салаларындағы 2020-2022 жылдарға арналған салалық келісімге қол қойылды. Осы салалық келісімде 1,3 коэффициентімен бірінші разрядтың айлық тарифтік мөлшерлемесінің мөлшері ұлғайтылды. Қабылданған шешім 2020 жылғы 1 қаңтардан бастап мұнай – газ саласының бірінші разрядты қызметкерінің айлық тарифтік мөлшерлемесінің (айлықақысының) ең төменгі мөлшерін 55 мың теңгеге дейін ұлғайтуға мүмкіндік берді, осылайша бұл өсім республика бойынша айлық жалақының ең төменгі мөлшерінен (ЖӨӨМ — 42 500 теңге) жоғары болды”, – деп хабарлады министр. “Салалық комиссияның хаттамалық тапсырмаларын іске асыру үшін “Теңізшевройл” ЖШС, “Қарашығанақ Петролеум Оперейтинг Б. В.”, “СНПС-Ақтөбемұнайгаз” компаниялары әлеуметтік-экономикалық мәселелерді шешуге және мердігерлік ұйымдарда наразылықтар акцияларының алдын алуға бағытталған кешенді іс — шаралар жоспарын әзірлеп, бекітті, сондай-ақ “ҚазМұнайГаз “ҰК” АҚ еншілес тәуелді ұйымдарында әлеуметтік тұрақтылық деңгейін арттыру жөніндегі іс-шаралар жоспары бекітілді”, – деп Н. Ноғаев түйіндеді.
