ОПЕК+ келісімі аясында Қазақстан қандай іс-әрекеттер жасайтынын Энергетика министрі Нұрлан Ноғаев айтып берді, деп “ҚазАқпарат”ХАА тілшісі хабарлайды.
“Коронавирустың таралуына, қатаң шектеу шараларына, мұнайға сұраныс пен ұсыныс теңгерімінің бұзылуына, мұнай мен мұнай өнімдерінің әлемдік қорларының ұлғаюына және осыған байланысты мұнай қоймаларының толып кетуіне және көптеген мұнай өндіруші елдерде, оның ішінде Қазақстанда мұнай өндіруді тоқтату қаупінің туындауына байланысты Үкімет “көмірсутектерді барлау мен өндіру және өндіру операцияларын жүргізу үшін жер қойнауы учаскелерін пайдалануға уақытша шектеулер енгізу туралы”қаулы жобаларын қабылдады. Үкімет пен ОПЕК+ келісіміне қатысушы елдер мұнай өндіру көлемін қысқарту аясында қабылдаған шаралардың нәтижесінде 2020 жылдың қорытындысы бойынша мұнай бағасы 1 баррель үшін 18 доллардан 50 долларға дейін өсті”, — деді Нұрлан Ноғаев Министрліктің алқа отырысында. Оның айтуынша, мұндай бағамен мұнай экспортынан түсетін есептік пайданың өсуі, тіпті өндіруді шектеуді ескере отырып, 2021 жылы шартты түрде 14 млрд құрайды. “Экономикалық ынтымақтастық және даму ұйымының қоймаларындағы коммерциялық мұнай қоры 3214 млн баррельден 3077 млн баррельге дейін төмендеді”, — деп министр түйіндеді.
