«Время» газеті Қазақстан Республикасы Энергетика министрлігінің баспасөз қызметінен Алматы облысында атом электр станциясын салу жөнінде жан-жақты түсініктеме алды.
3 сәуірде Ресей президенті Владимир Путин Қазақстан Президенті Қасымжомарт Тоқаевпен Мәскеуде болған келіссөзде Қазақстанда АЭС салуды ұсынды. Бұл қазақстандықтар тарапынан көптеген пікірлер тудырды.
Министрлікте хабарлағандай, республиканың энергетикалық қуатының болжамды теңгеріміне жүргізілген бағалауға сәйкес, 2030 жылға қарай Қазақстанның оңтүстігіндегі базалық қуаттың 2,7 ГВт-қа дейін тапшылығы күтілуде. Осыған байланысты бу-газ, гидроэлектр және атом станцияларын салу сияқты отынның әртүрлі түрлерін және энергия көздерін пайдалана отырып, базалық және маневрлік генерацияны енгізу жолымен елдің оңтүстігіндегі тапшылықты жабу мүмкіндігі қарастырылуда.
Мүмкін болатын АЭС-тің экономикалық және техникалық параметрлерін нақтылау және реакторлық технологияны таңдау үшін нарықта бар III + буынды реакторлық технологиялар талдауын қамтитын техникалық-экономикалық негіздеменің маркетингтік бөлімі әзірленді. Ресейлік Росатом мемлекеттік компаниясын қоса алғанда, бес елден реакторлық технологияларды жеткізушілермен ақпарат алмасу жүзеге асырылды.
Сондай-ақ әлеуетті инвесторлар елдің оңтүстік облыстарында маневрлік газ генерациясын, Ертіс өзеніндегі Шүлбі су электр станциясының контрреттегіштерін және Іле өзеніндегі Қапшағай ГЭС-ін салу нұсқаларын қарастыруда, Шымкент жылу электр станциясы алаңында қуаты 450 МВт-қа жуық жаңа бу-газ электр станциясын салу жөнінде ұсыныстар берілді.
Барлық ұсынылатын жобалардың мүмкіндіктері мен әлеуетін мұқият зерделегеннен кейін, электр энергиясын өндіруде Қазақстан үшін ең оңтайлы және қолайлы технологиялар айқындалатын болады. АЭС таңдалған жағдайда, Қазақстан заңдарына сәйкес, АЭС салу жөніндегі шешімді Үкімет қоғамдық тыңдаулардан және жергілікті атқарушы органдармен келісілгеннен кейін, сондай-ақ шаруашылық міндеттерді шешу үшін қажеттіліктің, қауіпсіздіктің және жағдайлардың болуын ескере отырып қабылдайды.
АЭС құрылысының тақырыбы жаңа емес, көп жылдар бойы, оның ішінде Балқаш көлі ауданында да талқыланды. Енді Алматы облысы туралы сөз болып отыр. Біз интеграциялық процестерді талдау орталығының жетекші маманы Ұлықбек Бабағұловтан осы мәселе бойынша түсініктеме алуды шештік.
«Росатом АЭС құрылысының жаңа жобасы, іске аспаған Балқаштағы бұрынғы жағдай сияқты болуы мүмкін деген қауіп бар. Қоғамдық тыңдауларды келісу және өткізу қажеттілігі туралы сөздер түпкілікті шешім қабылдау процесін ұзаққа созуы мүмкін. Бұл жағдайда бұл созылым саяси себептермен, атап айтқанда қазіргі президенттің уақытша мәртебесімен, сондай-ақ жаңа президент сайлау қарсаңында Мәскеуден қосымша жеңілдіктер алу үшін осы тақырып пайдаланылуы мүмкін» — деп есептейді сарапшы.
Сурет: Sputnik
