Қазақстан Бас прокуратурасының құқықтық статистика және арнайы есепке алу жөніндегі комитеті билік органдарының кәсіпкерлік қызметке заңсыз араласу фактілерінің жолын кесу бойынша жүргізіліп жатқан жұмыстар туралы айтты.
Мемлекет басшысы Қасым-Жомарт Тоқаевтың Жарлығымен биыл 1 қаңтардан бастап шағын бизнес пен микрокәсіпкерлік субъектілеріне қатысты тексерулер жүргізуге мораторий енгізілгенін еске салды.
Азаматтардың өміріне, қоғамдық тәртіпке, конституциялық құрылысқа және ұлттық қауіпсіздікке қауіп төндіретін бұзушылықтардың алдын алуға немесе жоюға бағытталған тексерулердің ғана бұған қатысы болмайды.
Тексеруге бастамашылық ету үшін мемлекеттік орган оны құқықтық статистикада және арнайы есепке алу комитетінде немесе оның аумақтық бөлімшелерінде тіркеуі тиіс. Егер тексеру ерекше жағдайға сәйкес болмаса, оны ешкім тіркемейді.
Ағымдағы жылдың 10 айында комитет 170 тіркеуге рұқсат бермей, мемлекеттік органдардың кәсіпкерлік қызметке заңсыз араласуының алдын алды.
Осы уақыт аралығында бизнес субъектілеріне қатысты заңсыз тексеру жүргізгені үшін 48 лауазымды тұлға жауапкершілікке тартылды.
