Нұр-Сұлтанда жаппай төбелес болып, нәтижесінде марқұм азаматтық белсенді Дулат Ағаділдің ұлы қайтыс болды.
Елордалық ПД баспасөз қызметінің мәліметінше, 10 қараша күні сағат 22.56-да 102-арнаға “Болашақ” көшесі мен Көктал шағын ауданында болған жаппай төбелес туралы хабарлама келіп түскен.
Полиция қызметкерлері келгеннен кейін, төбелеске ұласқан бір топ жастар арасында жанжал туындағаны анықталды. Нәтижесінде екеуі дене жарақатын алды. Олардың бірі 17 жастағы Ж.Ағаділовке пышақ жарақаттары салынып, жедел жәрдем келген соң қайтыс болды. Аталған факті бойынша Қазақстан Республикасы Қылмыстық кодексінің 99 — бабының 2-бөлігі (адам өлтіру) және 293-бабының 3-бөлігі (бұзақылық) бойынша қылмыстық іс қозғалды, – делінген таратылған хабарламада.
Ұсталғандар бар. Жанжалдың барлық қатысушыларын анықтау үшін тергеу әрекеттері жүргізілуде.
Тергеу нәтижелері бойынша әркімнің іс-әрекетіне құқықтық баға берілетін болады.
Азаматтық белсенді Дулат Ағаділ ағымдағы жылдың ақпан айында тергеу изоляторында көз жұмды. Ол сотты құрметтемегені, судьяны, сот отырысына қатысушыларды қорлағаны, тергеу әрекеттерінен жалтарғаны үшін қылмыстық құқық бұзушылықтар жасағаны үшін ұсталды. Өлімнің себебі жүрек жеткіліксіздігі болды.
Сурет: zakon.kz
